ទិដ្ឋភាពទូទៅនៃគំរូបែបអព្ភន្តរញាណ
អ្នកគ្រប់គ្រង ក៏ដូចជាអ្នកធ្វើអាជីវកម្មភាគច្រើន រំពឹងទៅលើអព្ភន្តរញាណ (Intuition) នៅក្នុងការធ្វើសេចក្តីសម្រេចចិត្តឱ្យបានលឿន។ គំរូនៃការធ្វើសេចក្តីសម្រេចចិត្តដោយប្រើប្រាស់អព្ភន្តរញាណនេះ មានលក្ខណៈផ្ទុយគ្នាទៅនឹងគំរូនៃការធ្វើសេចក្តីសម្រេចចិត្តដោយវិចារណញាណ។ នៅក្នុងអាជីវកម្ម គំរូនេះអាចផ្តល់នូវផលប្រយោជន៍ជាច្រើនផងដែរ។
បើតាមការមើលទៅលើពាក្យថា អព្ភន្តរញាណនេះ អាចនឹងធ្វើឱ្យយើងគិតថា វាជាការប្រើញាណទី៦ ឬជាការធ្វើសេចក្តីសម្រេចចិត្តដោយការនឹកឃើញនូវដំណោះស្រាយអ្វីមួយដោយមិនសមហេតុសមផល ឬដោយចៃដន្យជាដើម។ ប៉ុន្តែធាតុពិត វាជាសមត្ថភាពមួយដែលប្រើប្រាស់បាន បន្ទាប់ពីមាននូវបទពិសោធន៍ និងការរៀនសូត្រជាច្រើនឆ្នាំទៅលើភាពពិត លំនាំផ្សេងៗ គំនិត វិធីសាស្ត្រនានាដែលជាលក្ខណៈអរូបីនៅក្នុងខួរក្បាល។
អត្ថបទទាក់ទង៖ គំរូនៃការធ្វើសេចក្ដីសម្រេចចិត្តបែបពិចារណាហេតុផល
ដំណើរការនៃគំរូបែបអព្ភន្តរញាណ
នៅក្នុងការធ្វើសេចក្តីសម្រេចចិត្តរបស់គំរូនេះ មិនមាននូវជំហាន ឬដំណាក់កាលដូចទៅនឹងគំរូដទៃទេ តែក្នុងនោះទាមទារឱ្យអ្នកធ្វើសេចក្តីសម្រេចចិត្ត មាននូវធាតុផ្សំមួយចំនួនដូចខាងក្រោម ដែលអាចញ៉ាំងឱ្យពួកគេប្រើប្រាស់អព្ភន្តរញាណរបស់ខ្លួន ទៅធ្វើសេចក្តីសម្រេចចិត្តឱ្យកាន់តែមានប្រសិទ្ធភាព។ ធាតុផ្សំទាំងនោះ មានដូចជា៖
- បទពិសោធន៍៖ អ្នកធ្វើសេចក្តីសម្រេចចិត្ត ស្វែងយល់ពីលំនាំ (Pattern) នៃការដោះស្រាយបញ្ហានីមួយៗបានតាមរយៈបទពិសោធន៍ដែលឆ្លងកាត់ដោយផ្ទាល់។ បទពិសោធន៍កាន់តែច្រើន នោះលំនាំកាន់តែច្រើនដែលពួកគេស្គាល់ ញ៉ាំងឱ្យពួកគេស្វែងរកបាននូវដំណោះស្រាយដែលមានប្រសិទ្ធភាពកាន់តែឆាប់រហ័ស។
- បណ្តាញ៖ សំដៅទៅលើបណ្ដាញទំនាក់ទំនង ដោយអ្នកធ្វើសេចក្តីសម្រេចចិត្តមានទំនាក់ទំនងជាមួយអ្នកដែលមានសមត្ថភាពខ្ពស់ ឬប្រហាក់ប្រហែលខ្លួន ហើយរៀនពីការធ្វើសេចក្តីសម្រេចចិត្តរបស់ពួកគេ។
- ការហ៊ានប្រឈមមុខនឹងកំហុស៖ អព្ភន្តរញាណ អាចអភិវឌ្ឍកាន់តែល្អប្រសើរមិនមែនតែនៅក្នុងស្ថានភាពដែលទទួលបានភាពជោគជ័យមួយមុខនោះទេ ការទទួលយកនូវកំហុស ហើយរៀនសូត្រពីវា ក៏អាចធ្វើឱ្យការប្រើប្រាស់នូវអព្ភន្តរញាណកាន់តែមានប្រសិទ្ធភាពផងដែរ។
- ការបើកចក្ខុវិស័យឱ្យទូលាយ៖ លោក ភីតថឺ ដ្រាក់ឃឺ (Peter Drucker) ធ្លាប់បានលើកឡើងថា “ការបារម្ភពីបញ្ហាជារឿយៗ មិនអាចជួយឱ្យអ្នកគ្រប់គ្រងដើរទៅមុខបានឡើយ។” គាត់ចង់សំដៅទៅលើការមើលឱ្យទូលាយនៅក្នុងការធ្វើសេចក្តីសម្រេចចិត្ត ប្រសិនបើរវល់តែមើលលើបញ្ហាតែមួយមុខ វាអាចធ្វើឱ្យខាតពេលជាច្រើន ហើយថែមទាំងញ៉ាំងឱ្យខកខាននូវជម្រើសនៃការធ្វើសេចក្តីសម្រេចចិត្តដែលផ្តល់នូវឱកាសល្អៗជាច្រើនផងដែរ។
- ដែនកំណត់៖ សំដៅទៅលើការមិនប្រើអន្តរញាណហួសហេតុពេក។ អ្នកធ្វើសេចក្តីសម្រេចចិត្តដែលជោគជ័យភាគច្រើន បន្ទាប់ពីទទួលបាននូវជម្រើសចុងក្រោយនៃការធ្វើសេចក្តីសម្រេចចិត្តហើយនោះ ពួកគេតែងតែធ្វើការប៉ាន់ស្មាននូវឥទ្ធិពលរបស់វាជាមុនសិន មុននឹងធ្វើការអនុវត្តចេញមក។
═━━━✥◈✥━━━═
ដកស្រង់ពី៖ សៀវភៅ ការគ្រប់គ្រង និងអភិវឌ្ឍស្ថាប័ន
About the Author
