ទិដ្ឋភាពទូទៅនៃគំរូ Recognition-Primed
នៅក្នុងអាជីវកម្ម ជាទូទៅយើងមិនមាននូវពេលវេលាច្រើន សម្រាប់ធ្វើសេចក្តីសម្រេចចិត្តនោះទេ ដែលភាគច្រើនអ្នកធ្វើសេចក្តីសម្រេចចិត្ត មិនមានពេលគ្រប់គ្រាន់នៅក្នុងការប្រៀបធៀបនូវជម្រើសទាំងឡាយដែលរកបាន។ គំរូ Recognition-Primed នេះ ត្រូវបានបង្កើតឡើងដោយលោក ហ្គែរី ខ្លេន (Gary A. Klein) នៅក្នុងអំឡុងឆ្នាំ ១៩៨៥។ គាត់បានរកឃើញថា អ្នកធ្វើសេចក្តីសម្រេចចិត្តភាគច្រើន ប្រើប្រាស់នូវរំញោចនៃផ្លូវចិត្ត (Mental Stimulation) ដែលវាជាចំណេះដឹងមួយដែលទទួលបានមកពីបទពិសោធន៍។
អត្ថបទទាក់ទង៖ គំរូនៃការធ្វើសេចក្ដីសម្រេចចិត្តបែប Bounded Rationality
គំរូនេះមាននូវជំហានសំខាន់ៗចំនួន៣ ដែលយើងត្រូវអនុវត្តនៅក្នុងដំណើរការនៃការធ្វើសេចក្តីសម្រេចចិត្ត៖
ដំណើរការនៃគំរូ Recognition-Primed
ជំហានទី១ – ការស្វែងយល់ពីស្ថានភាព (Expereincing the Situation)៖ នៅក្នុងជំហានដំបូងរបស់គំរូនេះ អ្នកត្រូវប្រមូលនូវព័ត៌មានដែលពាក់ព័ន្ធទៅនឹងស្ថានភាពដែលត្រូវដោះស្រាយឱ្យបានកាន់តែច្រើនកាន់តែល្អ។ អ្នកអាចធ្វើការស្វែងរកទិន្នន័យ ស្តាប់ព័ត៌មានពីភាគីពាក់ព័ន្ធ រួចធ្វើការវិភាគថាតើស្ថានភាពដែលកំពុងជួបប្រទះនោះមានភាពប្រែប្រួលអ្វីឬអត់ ហើយថាតើសេចក្តីសម្រេចចិត្តចាំបាច់ត្រូវធ្វើឡើងភ្លាមៗដែរឬក៏យ៉ាងណា។
ជំហានទី២ – ការវិភាគទៅលើស្ថានភាព (Analysing the Situation) គឺជាជំហានដែលអ្នកធ្វើសេចក្តីសម្រេចចិត្ត៖ ធ្វើការវិភាគទៅលើស្ថានភាពដោយស្វែងរកនូវដំណោះស្រាយដែលអាចទៅរួចមួយចំនួន។ ហើយជាទូទៅ ពួកគេពឹងផ្អែកទៅលើបទពិសោធន៍កន្លងមករបស់ពួកគេ ក្នុងការស្វែងរកដំណោះស្រាយ។ បន្ទាប់ពីបាននូវជម្រើសនៃសេចក្តីសម្រេចចិត្តចេញមកហើយ ពួកគេនឹងធ្វើការជ្រើសរើសនូវជម្រើសមួយដែលជាទូទៅគឺជាជម្រើសទីមួយ ដែលនឹកឃើញមុនគេ ឬជម្រើសតែមួយគត់ដែលអាចអនុវត្តបាន។
ជំហានទី៣ – ការអនុវត្តនូវសេចក្តីសម្រេចចិត្ត (Implementing the Decision)៖ នៅពេលដែលសេចក្តីសម្រេចចិត្តត្រូវបានធ្វើឡើង ការអនុវត្តត្រូវចាប់ផ្តើមក្នុងរយៈដ៏ខ្លីបំផុត ដើម្បីធ្វើឱ្យសេចក្តីសម្រេចចិត្តដែលត្រូវបានជ្រើសរើសចេញមកនោះ មានឥទ្ធិពលទៅលើស្ថានភាពដែលកំពុងតែចួបប្រទះ។
នៅក្នុងការអនុវត្តនូវគំរូមួយនេះ ការបណ្តុះបណ្តាល ដើរតួនាទីយ៉ាងសំខាន់សម្រាប់ក្រុមអ្នកធ្វើសេចក្តីសម្រេចចិត្ត នៅក្នុងការធ្វើសេចក្តីសម្រេចចិត្តឱ្យកាន់តែមានប្រសិទ្ធភាព។
គំរូនេះបង្កើតឡើងសម្រាប់ការធ្វើសេចក្តីសម្រេចចិត្តនៅក្នុងករណីដែលពេលវេលាមានភាពប្រថុចញ៉ុច ដែលទាមទារការបណ្តុះបណ្តាលទៅលើការធ្វើសេចក្តីសម្រេចជារឿយៗដែលអាចឱ្យសហគ្រាសទទួលបាននូវលទ្ធផលវិជ្ជមាន។
═━━━✥◈✥━━━═
ដកស្រង់ពី៖ សៀវភៅ ការគ្រប់គ្រង និងអភិវឌ្ឍស្ថាប័ន
About the Author
