១១ សំណួរដែលត្រូវសួរខ្លួនឯងសិន មុននឹងលាឈប់ពីការងារ !
ជាទូទៅបុគ្គលិកមួយដែលចង់លាឈប់ពីការងារ អាចមានសុទិដ្ឋិនិយមច្រើនលើកន្លែងការងារថ្មី។ ក៏ប៉ុន្តែមានសំណួរមួយសួរថា តើការជ្រើសរើសការងារនៅកន្លែងថ្មីពិតជាដំណោះស្រាយដ៏ល្អ ១០០% ដែរឬទេ? តើអ្នកបានត្រៀមខ្លួនរួចរាល់ហើយឬនៅ ដើម្បីស្វែងរកការងារថ្មីមួយ ឬក៏មានមហិច្ឆតាចង់បើកអាជីវកម្មមួយដោយខ្លួនឯង?
ការលាឈប់ពីការងារ គឺជាការសម្រេចចិត្តដ៏ធំមួយ និងមានទិដ្ឋភាពជាច្រើនដែលលោកអ្នកគួរពិចារណាឲ្យបានគ្រប់ជ្រុងជ្រោយ។ ទាំងនេះ លោកអ្នកត្រូវស្វែងរកចំណុចវិជ្ជមាន និងអវិជ្ជមានដែលលោកអ្នកកំពុងជួបក្នុងកន្លែងការងាររបស់អ្នក ឬអាចជួបនៅកន្លែងការងារថ្មី។
ហេតុដូច្នេះហើយនៅទីនេះ លោកអ្នកត្រូវសាកសួរខ្លួនឯងនូវសំនួរសំខាន់ៗចំនួន ១១ ដូចខាងក្រោមនេះ ដើម្បីឲ្យប្រាកដថា លោកអ្នកពិតជាបានត្រៀមខ្លួនរួចរាល់សម្រាប់ការងារនៅកន្លែងផ្សេង។
១. តើអ្វីទៅជាបញ្ហាដែលកំពុងកើតមាននៅក្នុងការងាររបស់អ្នកនៅពេលនេះ?
២. តើអ្នកចង់បានអ្វីសម្រាប់អាជីពការងាររបស់អ្នក? តើអ្វីទៅជាគោលដៅចុងក្រោយរបស់អ្នក?
៣. តើការងារអ្វីទៅដែលធ្វើឲ្យអ្នកសប្បាយចិត្តបំផុត? តើអ្វីទៅជាមហិច្ឆតាពិតប្រាកដរបស់អ្នក?
៤. តើអ្នកមានគម្រោងដើម្បីស្វែងរកការងារថ្មីហើយឬនៅ? តើអ្នកចង់បានការងារអ្វីនៅកន្លែងថ្មី?
៥. តើអ្នកនឹងចំណាយពេលប៉ុន្មានដើម្បីស្វែងរកការងារថ្មី? តើនេះជាពេលដ៏ល្អមួយដែរឬទេ ដើម្បីស្វែងរកការងារថ្មី? តើអ្នកអាចរកប្រាក់ចំណូលថ្មីបាននៅពេលណា?
៦. តើអ្នកមានស្ថិរភាពហិរញ្ញវត្ថុហើយឬនៅ? តើអ្នកមានលុយគ្រប់គ្រាន់សម្រាប់ចាយវាយនៅពេលដែលអ្នកកំពុងស្វែងរកការងារថ្មីដែរឬទេ?
៧. តើរយៈពេលប៉ុន្មានហើយដែលអ្នកបានធ្វើការនៅកន្លែងការងារបច្ចុប្បន្ន? តើអ្នកទទួលបានបទពិសោធន៍ច្រើនដែរឬទេពីការងារនេះ? រវាងការងារកំពុងធ្វើ និងការងារថ្មី តើណាមួយល្អជាង?
៨. តើស្ថានភាពធ្វើដំណើរទៅកន្លែងការងាររបស់អ្នកល្អដែរឬទេ?
៩. តើការងាររបស់អ្នកការប្រឈមមុខខ្លាំងដែរឬទេ? មានការប្រកួតប្រជែងទេ?
១០. តើអ្នកនឹងមានឱកាសទទួលបានការអភិវឌ្ឍអាជីពរបស់អ្នកដែរឬទេ នៅកន្លែងការងារបច្ចុប្បន្ន? តើការងាររបស់អ្នកមានការអភិវឌ្ឍប្រកបដោយស្តង់ដារដែរឬទេ?
១១. តើហេតុផលនៃការចាកចេញ ឬមិនចាកចេញរបស់អ្នកដោយសាររឿងមនោសញ្ចេតនា ឬបញ្ហាការងាររបស់អ្នក?
ជារួមមកវិញ អ្នកគួរតែចំណាយពេលយ៉ាងហោចណាស់ឲ្យបានម្តងទៅពីរដងក្នុងមួយឆ្នាំ ដើម្បីវាយតម្លៃស្ថាប័នការងារ និងមុខតំណែងរបស់អ្នក។ ហើយមុនពេលដើរចេញពីការងារអ្នក អ្នកគួរតែឆ្លើយនឹងសំណួរមួយចំនួនខាងលើនេះសិន។
អត្ថបទទាក់ទង
កុំធ្វើរឿង ៩ យ៉ាងនេះ ដើម្បីចៀសវាងភាពរកាំរកូសនៅកន្លែងធ្វើការ